今天是:

སྲིད་ཇུས་ཡིག་ཆ།

ཀྲུང་དབྱང་སྲིད་ཇུས།

མདུན་ཤོག > སྲིད་ཇུས་ཡིག་ཆ། > ཀྲུང་དབྱང་སྲིད་ཇུས།

ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་གྲོང་གསེབ་དར་སྤེལ་གཏོང་བའི་འཐབ་ཇུས་ལག་བསྟར་སྐོར་གྱི་བསམ་འཆར། (ཁག་ལྔ་བ།)

བཅུ། སྤྱི་ཚོགས་ཡོངས་ཀྱི་སྟོབས་ཤུགས་གཅིག་ཏུ་བསྒྲིལ་ཏེ། གྲོང་གསེབ་དར་སྤེལ་ལ་འཇོན་མིས་འདེགས་སྐྱོར་བྱེད་ཤུགས་ཇེ་དྲག་ཏུ་གཏོང་དགོས།

གྲོང་གསེབ་དར་སྤེལ་གྱི་འཐབ་ཇུས་ལག་བསྟར་བྱེད་པར། འཇོན་མི་དཀོན་པའི་བཀག་རྒྱ་ངེས་པར་གཏོར་དགོས། མི་ཤུགས་མ་རྩ་གསར་སྤེལ་བྱ་རྒྱུ་དེ་གོ་གནས་གཙོ་བོར་བཞག་སྟེ། རིག་སྟོབས་དང་ལག་རྩལ། དོ་དམ་བཅས་ཞིང་སྡེར་སྐྱོད་ལམ་ཡངས་པོར་ཕྱེ་སྟེེ། ཞིང་སྡེའི་རང་ས་རང་ཡུལ་གྱི་འཇོན་མི་གང་མང་སྐྱེད་སྲིང་དང་གནམ་འོག་གི་འཇོན་མི་མང་པོ་བསྡུས་ནས་བཀོལ་དགོས།

(གཅིག)གསར་བྱུང་གི་ལས་རིགས་ཞིང་པ་ཤུགས་ཆེན་པོས་གསོ་སྐྱོང་བྱ་དགོས།

ཁྱོན་ཡོངས་ནས་ལས་རིགས་ཞིང་པའི་ལམ་ལུགས་འཛུགས་པ་དང་། ཆ་སྡེབ་སྲིད་ཇུས་མ་ལག་འཐུས་ཚང་དུ་གཏོང་དགོས། གསར་བྱུང་གི་ལས་རིགས་ཞིང་པ་གསོ་སྐྱོང་བཟོ་སྐྲུན་ལག་བསྟར་བྱས་ཏེ། གསར་བྱུང་གི་ལས་རིགས་ཞིང་པ་ལྡེམ་གཤིས་ཅན་གྱི་སློབ་ཡུན་སྤྱད་དེ་འབྲིང་རིམ་དང་མཐོ་རིམ་གྱི་ཞིང་པའི་ལས་རིགས་སློབ་གསོར་ཞུགས་པར་རྒྱབ་སྐྱོར་བྱ་དགོས། ཟབ་སྦྱོང་ནང་རྐྱེན་གསར་སྐྲུན་བྱས་ཏེ་ཞིང་པའི་ཆེད་ལས་མཉམ་ལས་ཁང་དང་ཆེད་ལས་ལག་རྩལ་མཐུན་ཚོགས། སྣེ་ཁྲིད་ཁེ་ལས་སོགས་ཀྱིས་ཟབ་སྦྱོང་འགན་ལེན་བྱེད་པར་རྒྱབ་སྐྱོར་བྱ་དགོས།ཆ་རྐྱེན་དང་འཚམ་པའི་གསར་བྱུང་གི་ལས་རིགས་ཞིང་པ་མཁར་གྲོང་གི་ལས་བཟོ་པའི་རྒན་གསོ་དང་སྨན་བཅོས་འགན་སྲུང་སོགས་སྤྱི་ཚོགས་འགན་སྲུང་ལམ་ལུགས་སུ་ཞུགས་པར་སྣེ་འཁྲིད་དགོས། ས་གནས་སོ་སོས་ལས་རིགས་ཞིང་པའི་ལས་རིགས་ཐོབ་ཐང་དཔྱད་ཞིབ་གཏན་འབེབས་ཚོད་ལྟ་བྱ་བར་སྐུལ་མ་གཏོང་དགོས།

(གཉིས།)ཞིང་སྡེའི་ཆེད་ལས་འཇོན་མིའི་དཔུང་སྡེ་འཛུགས་སྐྲུན་ཐད་ཤུགས་བསྣན་དགོས། རྫོང་ཁོངས་ཀྱི་ཆེད་ལས་འཇོན་མི་གཅིག་གྱུར་འཆར་འགོད་ཀྱིས་བཀོལ་བའི་ལམ་ལུགས་བཙུགས་ཏེ། ཞིང་སྡེའི་ཆེད་ལས་འཇོན་མིའི་ཞབས་ཞུའི་འགན་སྲུང་ནུས་པ་ཇེ་ཆེར་གཏོང་དགོས། འཇོན་མིའི་དོ་དམ་འགན་ནུས་སྡེ་ཁག་གིས་ལས་ཁུངས་ཁུ་བསྡུ་དང་དབང་ཆ་གཤམ་སྤྲོད་བྱེད་པར་སྐུལ་འདེད་བྱས་ཏེ། གཞི་རིམ་དུ་མི་བཀོལ་མཁན་གྱི་རང་བདག་དབང་ཆར་འགན་སྲུང་དང་དོན་འཁྱོལ་བྱ་དགོས། གྲོང་གསེབ་ཀྱི་དགེ་རྒན་ལ“རྫོང་གིས་དོ་དམ་དང་སློབ་གྲྭས་གདན་ཞུ”བྱེད་པ་སྐུལ་འདེད་བྱ་དགོས། མཐའ་འཁོབ་དབུལ་ཕོངས་ས་ཁུལ་དང་མཐའ་མཚམས་ཀྱི་མི་རིགས་ས་ཁུལ་དང་གསར་བརྗེའི་ཁུལ་རྙིང་བཅས་ལ་འཇོན་མིས་རོགས་སྐྱོར་བྱེད་པའི་འཆར་གཞི་ལག་བསྟར་ལེགས་པོ་བྱས་ཐོག “རོགས་སྐྱོར་གསུམ་དང་དབུལ་སྐྱོར་གཅིག”དང་དམིགས་བསལ་ལས་རྐང་གི་དགེ་རྒན་འཆར་གཞི་སོགས་མུ་མཐུད་དུ་ལག་བསྟར་བྱེད་པ་དང་། མཐོ་རིམ་སློབ་གྲྭའི་མཐར་ཕྱིན་སློབ་མ་གཞི་རིམ་དུ་འཚར་ལོངས་འབྱུང་བའི་འཆར་གཞི་རྩ་འཛུགས་བྱས་ཏེ་ལག་བསྟར་བྱ་དགོས། ས་གནས་ཀྱི་མཐོ་རིམ་སློབ་གྲྭ་དང་ལས་རིགས་སློབ་གླིང་གིས་སློབ་གསོའི་ཟབ་སྦྱོང་ཐོན་ཁུངས་ཕྱོགས་བསྡུས་སྒོས་བེད་སྤྱོད་པར་རོགས་སྐྱོར་བྱས་ཏེ། ཆེད་ལས(ཁ་ཕྱོགས)གང་ལ་གང་མཁོས་འཛུགས་པ་དང་། འཇོན་མི་སྐྱེད་སྲིང་རྣམ་པ་གསར་སྐྲུན་བྱས་ཏེ། གྲོང་གསེབ་དར་སྤེལ་པར་ཆེད་ལས་ཅན་གྱི་འཇོན་མི་སྐྱེད་སྲིང་བྱ་དགོས། ཞིང་པའི་ལས་རིགས་ཀྱི་བདག་གཉེར་མཁན་དང་བར་ཁེ་པ། ཞིང་སྡེའི་ལག་ཤེས་པ། རིག་གནས་པ། གཟུགས་འདས་ཤུལ་བཞག་རིག་གནས་རྒྱུད་འཛིན་པ་སོགས་ལ་རོགས་སྐྱོར་བྱས་ཏེ་སྐྱེད་སྲིང་བྱ་དགོས།

(གསུམ།)ཚན་རྩལ་འཇོན་མིའི་འདེགས་སྐྱོར་ནུས་པ་འདོན་སྤེལ་བྱ་དགོས།

ཁྱོན་ཡོངས་ནས་མཐོ་རིམ་སློབ་གླིང་དང་ཚན་རིག་ཞིབ་འཇུག་གླིང་སོགས་དོན་ལས་སྡེ་ཚན་གྱི་ཆེད་ལས་ལག་རྩལ་མི་སྣས་གྲོང་གསེབ་དང་ཁེ་ལས་སུ་འགན་འགེལ་བ་དང་ཞོར་འགན་འཁུར་བ། ལས་གནས་དང་བྲལ་ནས་གསར་སྐྲུན་ལས་སྐྲུན་གྱི་ལམ་ལུགས་བཙུགས་ཏེ། ལས་རིགས་ཐོབ་ཐང་དཔྱད་ཞིབ་གཏན་འབེབས་དང་གླ་ཕོགས་ཕན་བདེ། སྤྱི་ཚོགས་འགན་སྲུང་སོགས་ཕྱོགས་ཀྱི་ཁེ་དབང་འགན་སྲུང་བྱ་དགོས། ཞིང་ལས་ཚན་རྩལ་ཞིབ་འཇུག་གི་ཁྱད་དུ་འཕགས་པའི་འཇོན་མིའི་འཆར་གཞི་དང་ཁྱད་དུ་འཕགས་པའི་ན་གཞོན་ཞིང་ལས་ཚན་རིག་པའི་ལས་གཞི་གཏིང་ཟབ་ཏུ་ལག་བསྟར་བྱ་དགོས། ས་བོན་ལས་རིགས་སོགས་ཁྱབ་ཁོངས་ཀྱི་ཚན་རྩལ་ཞིབ་འཇུག་མི་སྣའི་ཤེས་བྱའི་ཐོན་དབང་གསལ་འབྱེད་བྱེད་པ་རྨང་གཞི་དང་ཤེས་བྱའི་རིན་ཐང་ཁྲིད་ཕྱོགས་ཡིན་པའི་བགོ་བྱའི་སྲིད་ཇུས་འཐུས་ཚང་དུ་གཏོང་དགོས། སྤྱི་ཕན་རང་བཞིན་དང་ཚོང་གཉེར་རང་བཞིན་གྱི་ཞིང་ལས་ལག་རྩལ་ཁྱབ་གདལ་དུ་བཏང་ནས་མཉམ་འདྲེས་ངང་གོང་དུ་སྤེལ་བའི་ནང་རྐྱེན་འཚོལ་ཞིབ་བྱེད་པ་དང་། ཞིང་ལས་ལག་རྩལ་མི་སྣས་རིན་འཕར་ཞབས་ཞུ་འདོན་སྤྲོད་བྱས་པ་བརྒྱུད་དེ་འོས་འཚམ་གྱི་གླ་རྔན་ལེན་ཆོག་པར་བྱ་དགོས། ཞིང་ལས་ལག་རྩལ་ཁྱབ་གདལ་ཞབས་ཞུའི་ཆེད་དམིགས་གདན་ཞུའི་འཆར་གཞི་ཁྱོན་ཡོངས་ནས་ལག་བསྟར་བྱ་དགོས།

(བཞི།)སྤྱི་ཚོགས་ལས་རིགས་སོ་སོ་གྲོང་གསེབ་འཛུགས་སྐྲུན་ཁྲོད་ཞུགས་པར་སྐུལ་མ་གཏོང་དགོས།

ནུས་ལྡན་གྱི་སྐུལ་མ་གཏོང་བའི་ནང་རྐྱེན་འཛུགས་པ་དང་། ཕ་ཡུལ་ལ་བཅངས་པའི་བརྩེ་བ་དང་དུང་བ་སྦྲེལ་ཐག་བྱས་ཏེ། ཁེ་ལས་པ་དང་ཏང་སྲིད་ལས་བྱེད་པ། ཆེད་མཁས་ཡོན་ཏན་པ། སྨན་པ་དང་དགེ་རྒན། འཆར་འགོད་པ། བཟོ་བཀོད་པ། ཁྲིམས་རྩོད་པ། རྩལ་ནུས་འཇོན་མི་སོགས་ནང་འགུག་བྱེད་པར་རྒྱབ་སྐྱོར་བྱ་དགོས་ལ། གཞི་རིམ་དུ་སོང་ནས་དང་བླངས་པའི་འགན་འཁུར་བ་དང་མ་དངུལ་བཏང་ནས་ལས་རིགས་དར་སྤེལ་གཏོང་བ། སྡེ་བ་འགན་གཙང་ལེན་དང་ལས་གཞི་འགན་གཙང་ལེན། སྨན་པའི་ལས་གཉེར་པ་དང་སློབ་གྲྭ་བསྒྲུབ་པ། མ་དངུལ་དང་དངོས་པོས་ཞལ་འདེབས་འབུལ་བ། བཅའ་ཁྲིམས་ཀྱི་ཞབས་ཞུ་སྒྲུབ་པ་སོགས་ཀྱི་རྣམ་པ་བརྒྱུད་དེ་ཞིང་སྡེ་དར་སྤེལ་དུ་གཏོང་བའི་ལས་དོན་ལ་ཞབས་ཞུ་བསྒྲུབ་དགོས། དོ་དམ་བྱེད་ཐབས་ལ་ཞིབ་འཇུག་གཏན་འབེབས་བྱས་ཏེ། ཆ་རྐྱེན་དང་འཚམ་པའི་གཞུང་སྒྲུབ་ལས་བྱེད་པ་ཕྱིར་ཕ་ཡུལ་དུ་ལོག་སྟེ་ལས་འགན་ཁུར་ཆོག་པར་བྱེད་པ་དང་། འཇོན་མི་སྔར་ལས་མང་པོ་དེང་རབས་ཞིང་ལས་ཁྲོད་ཞུགས་ནས། ཞིང་པ་གསར་པ་སྐྱེད་སྲིང་བྱ་བར་ནང་འགུག་བྱེད་དགོས། བཟོ་ཚོང་མ་དངུལ་གྲོང་གསེབ་དར་སྤེལ་ཁྲོད་ཞུགས་པར་སྐུལ་མ་དང་ཁྲིད་སྟོན་བྱེད་པའི་སྐོར་གྱི་མཛུབ་སྟོན་བསམ་འཆར་མགྱོགས་མྱུར་ངང་གཏན་འབེབས་བྱས་ཏེ། དངུལ་བསྡུ་དངུལ་བསྐྱི་དང་ཆ་ཚང་ སྒྲིག་བཀོད་འཛུགས་སྐྲུན་ལ་རོགས་དངུལ་སྟེར་བ། དཔྱ་ཁྲལ་ཇེ་ཉུང་དུ་གཏོང་བའམ་མེད་པར་བཟོ་བ། བཀོལ་སྤྱོད་བྱས་ཆོག་པའི་ས་ཆ་སོགས་ཀྱི་རོགས་སྐྱོར་སྲིད་ཇུས་ལག་བསྟར་དང་འཐུས་ཚང་དུ་གཏོང་བ་དང་། སྲིད་ཇུས་ཀྱི་མཐའ་མཚམས་གསལ་ཐག་ཆོད་པར་བྱས་ཏེ་ཞིང་པའི་ཁེ་ཕན་ལ་སྲུང་སྐྱོབ་ལེགས་པོ་བྱ་དགོས། བཟོ་ཚོགས་དང་གུང་གཞོན་ཚོགས་པ། བུད་མེད་མཉམ་འབྲེལ་ལྷན་ཚོགས། ཚན་རྩལ་མཐུན་ཚོགས། དབང་པོ་སྐྱོན་ཅན་ལྷན་ཚོགས་སོགས་ཚོགས་པའི་རྩ་འཛུགས་ཀྱི་ལེགས་ཆ་དང་སྟོབས་ཤུགས་འདོན་སྤེལ་དང་། དམངས་གཙོའི་ཏང་ཁག་སོ་སོ་དང་བཟོ་ཚོང་མཉམ་འབྲེལ། ཏང་ཁག་གང་ལའང་མི་གཏོགས་པའི་མི་སྣ་སོགས་ཀྱི་དགེ་མཚན་ལྡན་པའི་ནུས་པ་འདོན་སྤེལ་བྱས་ཏེ། ཞིང་སྡེའི་ཐོན་ལས་གོང་སྤེལ་དང་སྐྱེ་ཁམས་ཁོར་ཡུག་སྲུང་སྐྱོབ། གྲོང་གསེབ་ཀྱི་ཡུལ་སྲོལ་དཔལ་ཡོན་འཛུགས་སྐྲུན། ཞིང་སྡེའི་ཉམས་ཞན་མང་ཚོགས་ལ་བྱམས་སྐྱོང་སོགས་བྱ་བར་རྒྱབ་སྐྱོར་བྱ་དགོས། གྲོང་གསེབ་དར་སྤེལ་གྱི“སྐྱེས་མའི་འགུལ་སྐྱོད”ལག་བསྟར་བྱས་ཏེ། གཞི་རིམ་དུ་སྐྱོད་པའི་རྩ་འཛུགས་དང་མི་སྣའི་དོ་དམ་ཞབས་ཞུ་ཤུགས་དྲག་ཏུ་བཏང་ནས། དེ་དག་གྲོང་གསེབ་དར་སྤེལ་གྱི་འཛུགས་སྐྲུན་རང་བཞིན་གྱི་སྟོབས་ཤུགས་སུ་འགྱུར་བར་བྱ་དགོས།

(ལྔ།)གྲོང་གསེབ་ཀྱི་འཇོན་མི་གསོ་སྐྱོང་དང་ནང་འདྲེན་བཀོལ་སྤྱོད་ཀྱི་ནང་རྐྱེན་གསར་གཏོད་བྱ་དགོས།

རང་བདག་གིས་སྐྱེད་སྲིང་དང་འཇོན་མི་ནང་འདྲེན་ཟུང་དུ་སྦྲེལ་བ་དང་། བསླབ་གནས་སློབ་གསོ་དང་ལག་རྩལ་ཟབ་སྦྱོང་། ལག་ལེན་སྦྱོང་བརྡར་སོགས་རྣམ་པ་མང་པོ་མཉམ་སྤྱོད་ཀྱིས་མི་ཤུགས་ཐོན་ཁུངས་གསར་སྤེལ་བྱེད་པའི་ནང་རྐྱེན་འཛུགས་དགོས། གྲོང་ཁྱེར་དང་གྲོང་གསེབ། ས་ཁོངས། སློབ་གྲྭ་དང་ས་གནས་བཅས་བར་དུ་འཇོན་མི་གསོ་སྐྱོང་མཉམ་འབྲེལ་དང་བརྗེ་རེས་ཀྱི་ནང་རྐྱེན་འཛུགས་དགོས། གྲོང་ཁྱེར་གྱི་སྨན་པ་དང་དགེ་རྒན། ཚན་རྩལ་རིག་གནས་པ་སོགས་ཀྱིས་དུས་ངེས་གཏན་སྒོས་གྲོང་གསེབ་ལ་ཞབས་ཞུ་སྒྲུབ་པའི་ནང་རྐྱེན་ཁྱོན་ཡོངས་ནས་འཛུགས་པ་དང་། གྲོང་ཁྱེར་གྱི་ཆེད་ལས་འཇོན་མི་གྲོང་གསེབ་དར་སྤེལ་ཁྲོད་ཞུགས་པར་སྐུལ་མ་གཏོང་བའི་སྲིད་ཇུས་ཞིབ་འཇུག་གཏན་འབེབས་བྱ་དགོས།


བཅུ་གཅིག དངུལ་གཏོང་དངུལ་བསྡུའི་ཐབས་ལམ་རྒྱ་བསྐྱེད་དེ་གྲོང་གསེབ་དར་སྤེལ་ཐད་དངུལ་གཏོང་བར་འགན་སྲུང་བྱེད་ཤུགས་ཇེ་དྲག་ཏུ་གཏོང་དགོས།

གྲོང་གསེབ་དར་སྤེལ་གྱི་འཐབ་ཇུས་ལག་ཏུ་བསྟར་བར་ངེས་པར་མ་དངུལ་གང་ནས་ཡོང་དགོས་པའི་གནད་དོན་ཐག་གཅོད་དགོས། དངུལ་གཏོང་འགན་སྲུང་ལམ་ལུགས་འཐུས་ཚང་དུ་གཏོང་བ་དང་། དངུལ་གཏོང་དངུལ་བསྡུའི་ནང་རྐྱེན་གསར་སྐྲུན་བྱས་ཏེ། ནོར་སྲིད་ཀྱིས་སྔོན་ལ་འགན་སྲུང་དང་དངུལ་ལོར་གྱིས་གནད་སར་བཟུང་ནས་གཟིགས་སྐྱོང་། སྤྱི་ཚོགས་ཧུར་ཐག་སྒོས་ཞུགས་པའི་སྣ་མང་གི་དངུལ་གཏོང་གནས་བབ་མགྱོགས་མྱུར་ངང་ཆགས་པར་བྱས་ནས། དངུལ་གཏོང་གི་ཤུགས་ཚད་རྒྱུན་ཆད་མེད་པར་ཇེ་དྲག་དང་སྤྱི་འབོར་བསྟུད་མར་ཇེ་མང་དུ་འགྲོ་བར་ཁག་ཐེག་བྱ་དགོས།

(གཅིག)ནོར་སྲིད་ཀྱིས་དངུལ་གཏོང་ཚད་བསྟུད་མར་འཕར་བ་ཁག་ཐེག་བྱ་དགོས།

གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བར་ནོར་སྲིད་ཀྱིས་དངུལ་གཏོང་འགན་སྲུང་ལམ་ལུགས་འཐུས་ཚང་བར་འཛུགས་པ་དང་། སྤྱི་པའི་ནོར་སྲིད་ཀྱིས་སྔར་ལས་ཤུགས་ཆེན་པོས“ཞིང་གསུམ”ལ་གཟིགས་སྐྱོང་བྱས་ནས། ནོར་སྲིད་ཀྱིས་དངུལ་གཏོང་བ་དེ་གྲོང་གསེབ་དར་སྤེལ་གྱི་དམིགས་ཚད་ལས་འགན་དང་བསྟུན་ཐུབ་པ་ཁག་ཐེག་བྱ་དགོས། ནོར་སྲིད་ཀྱི་འདོན་སྤྲོད་སྒྲིག་གཞི་ལེགས་སྒྱུར་བྱས་ཏེ། ལས་རིགས་ནང་ཁུལ་དུ་མ་དངུལ་བསྡུ་རུབ་དང་ལས་རིགས་བར་དུ་མ་དངུལ་གཅིག་གྱུར་སྒོས་ཕན་ཚུན་སྦྲེལ་མཐུད་མཉམ་འབྲེལ་བྱ་བར་སྐུལ་འདེད་དང་། ས་གནས་རང་བདག་གིས་གཅིག་གྱུར་གྲབས་གསོག་གི་བར་སྟོང་ཇེ་ཆེར་བཏང་ནས། ཞིང་ལས་དང་འབྲེལ་བའི་མ་དངུལ་གཅིག་གྱུར་སྒོས་བསྡུ་རུབ་བྱེད་པའི་ཡུན་ཕན་ནང་རྐྱེན་མགྱོགས་མྱུར་ངང་འཛུགས་དགོས། ནོར་སྲིད་མ་དངུལ་གྱི་སྣེ་ཁྲིད་ནུས་པ་འདོན་སྤེལ་གང་ལེགས་བྱས་ཏེ། དངུལ་ལོར་དང་སྤྱི་ཚོགས་ཀྱི་མ་དངུལ་སྔར་ལས་མང་པོར་གྲོང་གསེབ་དར་སྤེལ་ཁྲོད་གཏོང་བར་ཡར་སྐུལ་བྱ་དགོས། རྒྱལ་ཡོངས་ཞིང་ལས་ཡིད་རྟོན་དངུལ་བུན་འགན་ལེན་མ་ལག་གི་བྱེད་ནུས་དངོས་གནས་འདོན་སྤེལ་བྱས་ཏེ། ནོར་སྲིད་ཀྱིས་འགན་ལེན་རིན་ཚད་ཁ་གསབ་སྟེར་བ་དང་བྱ་དགས་ཁ་གསབ་ཀྱི་ཚབ་བྱེད་པ་སོགས་བརྒྱུད་ནས། གསར་བྱུང་གི་ཞིང་ལས་ཀྱི་བདག་གཉེར་གཙོ་གཞིར་རྒྱབ་སྐྱོར་བྱེད་ཤུགས་ཇེ་ཆེར་གཏོང་དགོས། རྒྱལ་ཁབ་ཀྱི་དངུལ་བསྡུ་འགན་ལེན་ཐེབས་རྩ་མགྱོགས་མྱུར་ངང་བཙུགས་ཏེ། དངུལ་བསྡུ་བར་འགན་ལེན་དང་ཡིད་རྟོན་གྱི་ནུས་པ་ཇེ་དྲག་ཏུ་བཏང་སྟེ། དངུལ་ལོར་ཐོན་ཁུངས་མང་པོས་གྲོང་གསེབ་དར་སྤེལ་ལ་རྒྱབ་སྐྱོར་བྱེད་པར་སྣེ་འཁྲིད་དགོས། ས་གནས་སྲིད་གཞུང་གིས་སྤྱིར་བཏང་གི་བུན་འཛིན་བཀྲམ་སྟེ་གྲོང་གསེབ་དར་སྤེལ་དང་དབུལ་ཐར་མཁྲེགས་གཏོར་ཁྱབ་ཁོངས་ལ་རྒྱབ་སྐྱོར་བྱེད་པའི་སྤྱི་ཕན་རང་བཞིན་གྱི་ལས་གཞི་བསྐྲུན་པར་རྒྱབ་སྐྱོར་བྱ་དགོས། ས་གནས་སྲིད་གཞུང་གི་ཆེད་སྤྱོད་བུན་འཛིན་དོ་དམ་བཅོས་བསྒྱུར་ལ་བརྟན་འཇགས་ངང་སྐུལ་འདེད་བྱས་ཏེ། ས་གནས་སྲིད་གཞུང་གིས་ལས་གཞིར་དངུལ་བསྡུ་དང་ཁེ་འབབ་དོ་མཉམ་གཏོང་བའི་ཆེད་སྤྱོད་བུན་འཛིན་ཚོད་ལྟའི་སྒོ་ནས་འགྲེམ་པར་སྐུལ་མ་གཏོང་བ་དང་། ཆ་རྐྱེན་དང་མཐུན་ཞིང་ཁེ་འབབ་ཚད་ངེས་ཅན་ལྡན་པའི་གྲོང་གསེབ་ཀྱི་སྤྱི་ཕན་རང་བཞིན་གྱི་ལས་གཞི་བསྐྲུན་པར་རྒྱབ་སྐྱོར་བྱ་དགོས། ས་གནས་སྲིད་གཞུང་གི་བུ་ལོན་ལེན་པ་དང་དངུལ་བསྡུའི་བྱ་སྤྱོད་ཚད་ལྡན་དུ་བཏང་ནས། གྲོང་གསེབ་དར་སྤེལ་གྱི་མིང་གཡར་ཏེ་ཁྲིམས་འགལ་སྲོལ་འགལ་གྱིས་རྣམ་པ་བསྒྱུར་ནས་བུ་ལོན་བླངས་མི་ཆོག

(གཉིས།)མ་དངུལ་བསྡུ་རུབ་ཀྱི་ཐབས་ལམ་རྒྱ་བསྐྱེད་དགོས།

ས་ཞིང་གཞན་ལ་བསྐོར་བའི་ཡོང་སྒོ་བཀོལ་སྤྱོད་ཁྱབ་ཁོངས་ལེགས་སྒྲིག་དང་འཐུས་ཚང་དུ་བཏང་སྟེ། ཞིང་ལས་དང་ཞིང་སྡེའི་ཐད་ལ་དངུལ་གཏོང་བའི་བསྡུར་ཚད་སྔར་ལས་ཇེ་མཐོར་གཏོང་དགོས། བེད་སྤྱད་མེད་པའི་ས་ཞིང་གསར་སྤེལ་བྱེད་པར་ཚོད་འཛིན་ནན་མོ་བྱས་ཐོག སྟོབས་ཤུགས་གཅིག་བསྡུས་སྒོས་ཚད་གཞི་མཐོ་བའི་ཞིང་སའི་འཛུགས་སྐྲུན་ལ་སྐུལ་འདེད་གཏོང་དགོས། རྨོ་ཞིང་འཛིན་སྤྱོད་དང་ཁ་གསབ་དོ་མཉམ་ཡོང་བར་དོ་དམ་བྱེད་ཐབས་ཇེ་ལེགས་སུ་བཏང་སྟེ། ཚད་གཞི་མཐོ་བའི་ཞིང་སའི་འཛུགས་སྐྲུན་སོགས་གསར་དུ་བསྣན་པའི་རྨོ་ཞིང་གི་དམིགས་ཚད་དང་གྲོང་ཁྱེར་དང་གྲོང་གསེབ་ཀྱི་འཛུགས་སྐྲུན་བྱེད་ས་སྣོན་འཕྲི་དང་སྦྲེལ་བའི་ལྷག་འཕྲོའི་དམིགས་ཚད་དེ་ཞིང་ཆེན་བརྒལ་ནས་སྙོམ་སྒྲིག་ནང་རྐྱེན་འཛུགས་དགོས་ཤིང་། ཁེ་ཕན་ཐོབ་པ་ཡོངས་རྫོགས་འགྲོ་སྒོའི་སྔོན་རྩིས་བརྒྱུད་དེ་དབུལ་ཐར་མཁྲེགས་གཏོར་གྱི་གྲུབ་འབྲས་བརྟན་སྲུང་དང་གྲོང་གསེབ་དར་སྤེལ་འཐབ་ཇུས་ལག་བསྟར་ལ་རྒྱབ་སྐྱོར་བྱེད་པའི་ཐད་བཀོལ་དགོས། དོན་དག་རེ་ལ་གྲོས་རེ་དང་བྱ་དགས་ཁ་གསབ་ཀྱི་ཚབ་བྱེད་པ་སོགས་ཀྱི་རྣམ་པ་ཁྱབ་གདལ་དུ་བཏང་ནས། ཐད་ཀར་ཕན་ཁེ་ཐོབ་པའི་གྲོང་གསེབ་ཀྱི་རྨང་གཞིའི་སྒྲིག་བཀོད་འཛུགས་སྐྲུན་ཐད་ལ་ཞིང་པས་ངལ་བ་དང་རྩོལ་བ་སྤྱད་པར་སྐུལ་མ་བཏང་སྟེ། ཞིང་པ་སྔར་ལས་མང་པོ་ཞིག་འཛུགས་སྐྲུན་དང་ལྟ་སྐྱོང་ཁྲོད་དུ་ཞུགས་སུ་འཇུག་དགོས།

(གསུམ།)དངུལ་ལོར་གྱི་ཞབས་ཞུའི་ཆུ་ཚད་ཇེ་མཐོར་གཏོང་དགོས།

ཞིང་སྡེའི་དངུལ་ལོར་བཅོས་བསྒྱུར་དང་གོང་སྤེལ་གྱི་ཡང་དག་པའི་ཁ་ཕྱོགས་རྒྱུན་འཁྱོངས་བྱས་ཏེ། ཞིང་ལས་དང་ཞིང་སྡེའི་ཁྱད་ཆོས་དང་མཐུན་པའི་ཞིང་སྡེའི་དངུལ་ལོར་མ་ལག་འཐུས་ཚང་དུ་འཛུགས་དགོས་པ་དང་། ཞིང་སྡེའི་དངུལ་ལོར་ལས་ཁུངས་འབྱུང་གཞིར་ཕྱིར་ལོག་པར་སྐུལ་འདེད་བཏང་ནས། དངུལ་ལོར་ཐོན་ཁུངས་སྔར་ལས་མང་པོ་ཞིང་སྡེའི་དཔལ་འབྱོར་དང་སྤྱི་ཚོགས་གོང་སྤེལ་གྱི་ཁྱབ་ཁོངས་གཙོ་བོ་དང་ཉམས་ཞན་སར་བཀོད་སྒྲིག་བྱས་ནས། གྲོང་གསེབ་དར་སྤེལ་ཕྱོགས་ཀྱི་སྣ་མང་ཅན་གྱི་དངུལ་ལོར་དགོས་མཁོ་སྔར་ལས་ལེགས་པོའི་སྒོ་ནས་བསྐང་དགོས། དངུལ་ལོར་ཞབས་ཞུ་སྒྲུབ་སྟངས་གསར་གཏོད་བྱེད་ཤུགས་ཇེ་དྲག་ཏུ་བཏང་ནས། དངོས་མིན་རྫུན་ཟོལ་ཕྱོགས་སུ་འགྲོ་བར་གཏན་འགོག་དང་། ཉེན་ཁར་ཚོད་འཛིན་དང་བཀག་འགོག་ནན་མོ་བྱས་ཏེ། གྲོང་གསེབ་དར་སྤེལ་གཏོང་བར་དངུལ་ལོར་གྱིས་ཞབས་ཞུ་སྒྲུབ་ནུས་དང་ཆུ་ཚད་ཇེ་མཐོར་གཏོང་དགོས། གྲོང་གསེབ་དར་སྤེལ་གཏོང་བར་དངུལ་ལོར་གྱིས་ཞབས་ཞུ་སྒྲུབ་པའི་སྐོར་གྱི་མཛུབ་སྟོན་བསམ་འཆར་གང་མགྱོགས་སྒོས་འདོན་པ་དང་། ཀྲུང་གོའི་ཞིང་ལས་དངུལ་ཁང་དང་ཀྲུང་གོའི་སྦྲག་སྲིད་གསོག་འཇོག་དངུལ་ཁང་གི“ཞིང་གསུམ”དངུལ་ལོར་ལས་དོན་པུའུ་ཡིས་གྲོང་གསེབ་དར་སྤེལ་གཏོང་བར་རོགས་སྐྱོར་བྱེད་ཤུགས་ཇེ་ཆེར་གཏོང་དགོས། རྒྱལ་ཁབ་གསར་སྤེལ་དངུལ་ཁང་དང་ཀྲུང་གོའི་ཞིང་ལས་གོང་སྤེལ་དངུལ་ཁང་གིས་གྲོང་གསེབ་དར་སྤེལ་ཁྲོད་ཀྱི་འགན་འཁྲི་གཏན་འཁེལ་གསལ་པོར་བྱེད་པ་དང་། དངུལ་ལོར་གྱིས་ཞབས་ཞུ་སྒྲུབ་སྟངས་གསར་གཏོད་བྱེད་ཤུགས་ཇེ་དྲག་ཏུ་བཏང་ནས། གྲོང་གསེབ་དར་སྤེལ་གཏོང་བར་དུས་ཡུན་རིང་འབྲིང་གི་ཡིད་རྟོན་དངུལ་བུན་གྱིས་རྒྱབ་སྐྱོར་ཆེན་པོ་བྱ་དགོས། ཞིང་སྡེའི་ཡིད་རྟོན་ཁང་དང་ཞིང་ཆེན་མཉམ་འབྲེལ་ཁང་གི་བཅོས་བསྒྱུར་ལ་སྐུལ་འདེད་བྱས་ཏེ། ཞིང་སྡེའི་ཡིད་རྟོན་ཁང་གི་རྫོང་ཁོངས་ཀྱི་ཁྲིམས་མིའི་གོ་གནས་དང་གྲངས་ཚད་སྤྱིའི་ཆ་ནས་བརྟན་འཇགས་ཡིན་པ་རྒྱུན་འཁྱོངས་དང་། སྡེ་བ་དང་གྲོང་རྡལ་དངུལ་ཁང་གི་ཞུགས་འཐུས་ཆ་རྐྱེན་འཐུས་ཚང་དུ་བཏང་སྟེ། ས་གནས་ཁྲིམས་མིའི་དངུལ་ལོར་ལས་ཁུངས་ཀྱིས་གྲོང་གསེབ་དར་སྤེལ་ལ་ཞབས་ཞུ་ལེགས་པོ་བསྒྲུབ་དགོས། ཀུན་ཕན་དངུལ་ལོར་གྱིས་ཕན་གདགས་ཡུལ་གཙོ་བོ་གྲོང་གསེབ་ཏུ་འཇོག་པ་དང་། གསོག་དངུལ་མ་ཡིན་པའི་རིགས་ཀྱི་བུན་གཏོང་རྩ་འཛུགས་སྲོལ་ཡིག་འདོན་པར་སྐུལ་འདེད་དང་། དངུལ་ལོར་ལས་ཁུངས་ཀྱིས་གྲོང་གསེབ་དར་སྤེལ་ལ་ཞབས་ཞུ་བསྒྲུབ་པར་དཔྱད་ཞིབ་དང་དཔྱད་དཔོག་བྱེད་ཐབས་གཏན་འབེབས་བྱ་དགོས། ཆ་རྐྱེན་དང་མཐུན་པའི་ཞིང་ལས་དང་འབྲེལ་བའི་ཁེ་ལས་ཀྱིས་མ་རྐང་འཛིན་ཤོག་ཚོང་རར་འགྲེམ་པ་དང་པང་གསུམ་གསར་པའི་སྒོ་བྱང་འགེལ་བ། དངུལ་བསྡུ། མཉམ་ཉོ་བསྐྱར་སྒྲིག་བཅས་བྱ་བར་རྒྱབ་སྐྱོར་བྱེད་པ་དང་། ཞིང་ལས་ཐོན་རྫས་ཀྱི་དུས་ཟོང་དང་དུས་དབང་གི་ཚོང་ར་འཛུགས་སྐྲུན་ལ་སྐུལ་འདེད་གཏིང་ཟབ་བྱས་ཏེ། “ཉེན་འགོག་གི་ཁར་དུས་ཟོང”སྣོན་པའི་གི་ཚོད་ལྟ་བརྟན་འཇགས་ངང་རྒྱ་བསྐྱེད་པ་དང་། “མངག་ཐོའི་ཞིང་ལས་ཀྱི་ཁར་ཉེན་འགོག་སྣོན་པ་དང་། དེའི་ཁར་དུས་ཟོང་སྣོན་པར”ཚོད་ལྟ་བྱེད་པར་འཚོལ་ཞིབ་བྱ་དགོས། ཞིང་སྡེའི་དངུལ་ལོར་ལ་ཁྱད་པར་ཡོད་པའི་སྒོ་ནས་ལྟ་སྐུལ་དོ་དམ་གྱི་མ་ལག་ཇེ་ལེགས་སུ་བཏང་ཐོག ས་གནས་སྲིད་གཞུང་གི་དངུལ་ལོར་ཉེན་ཁ་འགོག་ཟོན་ཐག་གཅོད་འགན་འཁྲི་ཤུགས་དྲག་ཏུ་གཏོང་དགོས།


བཅུ་གཉིས། ཏང་གིས“ཞིང་གསུམ”བྱ་བར་མགོ་འཁྲིད་པ་རྒྱུན་འཁྱོངས་དང་འཐུས་ཚང་དུ་གཏོང་དགོས།

གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བ་ནི་ཏང་དང་རྒྱལ་ཁབ་ཀྱི་ཇུས་ཆོད་བཀོད་སྒྲིག་གལ་ཆེན་ཡིན་པས། རིམ་པ་སོ་སོའི་ཏང་ཨུ་དང་སྲིད་གཞུང་གིས་གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བའི་དོན་སྙིང་གལ་ཆེན་ལ་ངོས་ཟིན་ཚད་ཇེ་མཐོར་བཏང་སྟེ། གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་རྒྱུ་དེ་ངེས་པ་དོན་གྱིས་དམིགས་བསལ་གྱི་གོ་གནས་སུ་བཞག་སྟེ། ཏང་གིས་གྲོང་གསེབ་བྱ་བར་དོ་དམ་བྱེད་པའི་བླང་བྱ་དོན་ཐོག་ཏུ་འཁྱོལ་བར་བྱ་དགོས།

(གཅིག)ཏང་གི་ཞིང་སྡེའི་བྱ་བའི་མགོ་ཁྲིད་ཀྱི་སྒྲིག་སྲོལ་དང་ནང་རྐྱེན་འཐུས་ཚང་དུ་གཏོང་དགོས། རིམ་པ་སོ་སོའི་ཏང་ཨུ་དང་སྲིད་གཞུང་གིས་བཟོ་ལས་དང་ཞིང་ལས་མཉམ་དུ་འཛིན་པ་དང་། གྲོང་ཁྱེར་དང་གྲོང་གསེབ་མཉམ་དུ་འཛིན་པ་རྒྱུན་འཁྱོངས་བྱས་ཏེ། ཞིང་ལས་ཞིང་སྡེ་དམིགས་བསལ་གྱིས་སྔོན་ལ་གོང་དུ་སྤེལ་བའི་རྩ་དོན་དེ་ཕྱོགས་སོ་སོ་ནས་མངོན་པར་བྱ་དགོས། ཏང་ཨུས་གཅིག་གྱུར་གྱིས་མགོ་ཁྲིད་དང་སྲིད་གཞུང་གིས་འགན་འཁུར་བ། ཏང་ཨུའི་གྲོང་གསེབ་བྱ་བའི་སྡེ་ཁག་གིས་གཅིག་གྱུར་འཆར་འགོད་སྒོས་མཐུན་སྦྱོར་བྱེད་པའི་གྲོང་གསེབ་བྱ་བའི་མགོ་ཁྲིད་ཀྱི་སྒྲིག་སྲོལ་འཐུས་ཚང་དུ་གཏོང་དགོས། གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བའི་མགོ་ཁྲིད་ཀྱི་འགན་འཁྲི་ལམ་ལུགས་འཐུས་ཚང་དུ་གཏོང་བ་དང་། ཀྲུང་དབྱང་གིས་གཅིག་གྱུར་འཆར་འགོད་དང་ཞིང་ཆེན་གྱིས་སྤྱིའི་འགན་འཁུར་བ། གྲོང་ཁྱེར་དང་རྫོང་གིས་དོན་འཁྱོལ་འཛིན་པའི་བྱ་བའི་ནང་རྐྱེན་ལག་བསྟར་བྱ་དགོས། ཏང་སྲིད་ཀྱི་མགོ་ཁྲིད་དང་པོ་ནི་འགན་འཁུར་པ་དང་པོ་ཡིན་ལ། རིམ་པ་ལྔའི་ཧྲུའུ་ཅིས་གྲོང་གསེབ་དར་སྤེལ་འཛིན་དགོས། རྫོང་ཨུའི་ཧྲུའུ་ཅིས་ཤུགས་ཆེན་པོས“ཞིང་གསུམ”བྱ་བ་ལེགས་པོར་བཟུང་སྟེ་གྲོང་གསེབ་དར་སྤེལ་གྱི“ལས་ཡུལ་དང་པོའི་སྤྱིའི་བཀོད་འདོམས་པ”བཟང་པོ་ཞིག་བྱ་དགོས། སྡེ་ཁག་སོ་སོས་འགན་འཁྲི་ལྟར་བྱ་བའི་མཛུབ་སྟོན་ལ་ཤུགས་སྣོན་པ་དང་། ཐོན་ཁུངས་ཀྱི་གྲུབ་ཆ་རྒྱབ་སྐྱོར་དང་ལམ་ལུགས་འདོན་སྤྲོད་བྱེད་ཤུགས་ཇེ་དྲག་ཏུ་བཏང་ཐོག མཐུན་སྦྱོར་གཞོགས་འདེགས་ལེགས་པོ་བྱས་ཏེ་གྲོང་གསེབ་དར་སྤེལ་བྱ་བའི་སྒྲིལ་ཤུགས་ཆགས་སུ་འཇུག་དགོས། རིམ་པ་སོ་སོའི་ཏང་ཨུས་ཞིང་སྡེ་བྱ་བའི་སྡེ་ཁག་འཛུགས་སྐྲུན་ལ་དངོས་སུ་ཤུགས་བསྣན་ཏེ།《ཀྲུང་གོ་གུང་ཁྲན་ཏང་གི་བྱ་བའི་ལས་ཁུངས་ཀྱི་སྲོལ་ཡིག(ཚོད་ལྟའི་ལག་བསྟར)》གི་འབྲེལ་ཡོད་གཏན་འཁེལ་ལྟར། ཏང་གི་གྲོང་གསེབ་བྱ་བའི་ལས་ཁུངས་ཀྱི་སྒྲིག་འཛུགས་དང་མི་སྣའི་བཀོད་སྒྲིག་བྱ་བ་ལེགས་པོར་བསྒྲུབ་པ་དང་། ཇུས་ཆོད་ལ་བློ་འདོན་དང་གཅིག་གྱུར་སྒོས་མཐུན་སྦྱོར། སྲིད་ཇུས་ལ་མཛུབ་སྟོན། དོན་འཁྱོལ་ལ་སྐུལ་འདེད། ལྟ་སྐུལ་ཞིབ་བཤེར་སོགས་ཀྱི་འགན་ནུས་འདོན་སྤེལ་གང་ལེགས་བྱ་དགོས། ཞིང་ཆེན་(རང་སྐྱོང་ལྗོངས། ཐད་གཏོགས་གྲོང་ཁྱེར)སོ་སོའི་ཏང་ཨུ་དང་སྲིད་གཞུང་གིས་ལོ་རེར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་ལ་གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བའི་འཕེལ་རིམ་ལ་སྐུལ་འདེད་བཏང་བའི་གནས་ཚུལ་སྙན་ཞུ་འབུལ་དགོས། གྲོང་ཁྱེར་དང་རྫོང་གི་ཏང་སྲིད་མགོ་ཁྲིད་ཚན་ཁག་དང་མགོ་ཁྲིད་ལས་བྱེད་པས་གྲོང་གསེབ་དར་སྤེལ་འཐབ་ཇུས་ལག་ཏུ་བསྟར་བར་སྐུལ་འདེད་བཏང་བའི་གྲུབ་འབྲས་དངོས་ལ་དཔྱད་ཞིབ་ལམ་ལུགས་བཙུགསཏེ། དཔྱད་ཞིབ་མཇུག་འབྲས་དེ་མགོ་ཁྲིད་ལས་བྱེད་པ་འདེམ་བསྐོའི་གཞི་འཛིན་ས་གཙོ་བོ་བྱ་དགོས།

(གཉིས།)ཀྲུང་གོ་གུང་ཁྲན་ཏང་གི་ཞིང་སྡེའི་བྱ་བའི་སྲོལ་ཡིག་ཞིབ་འཇུག་གཏན་འབེབས་བྱ་དགོས། ཏང་གིས་བྱ་བ་མཐའ་དག་ལ་མགོ་འཁྲིད་པ་རྒྱུན་འཁྱོངས་བྱེད་པའི་བླང་བྱ་དང་དུས་རབས་གསར་པའི“ཞིང་གསུམ”བྱ་བའི་གནས་བབ་གསར་པ་དང་ལས་འགན་གསར་པ།བླང་བྱ་གསར་པ་གཞིར་བཟུང་ནས། ཀྲུང་གོ་གུང་ཁྲན་ཏང་གི་ཞིང་སྡེའི་བྱ་བའི་སྲོལ་ཡིག་ཞིབ་འཇུག་གཏན་འབེབས་བྱེད་པ་དང་། ཏང་གིས་ཞིང་སྡེའི་བྱ་བར་མགོ་ཁྲིད་པའི་སྲོལ་རྒྱུན་དང་བླང་བྱ། སྲིད་ཇུས་སོགས་ཏང་ནང་ཁུལ་ཁྲིམས་སྲོལ་གྱི་རྣམ་པའི་ཐོག་ནས་གཏན་འཁེལ་བྱས་ཏེ། ཞིང་སྡེའི་བྱ་བའི་མགོ་ཁྲིད་ལ་ཤུགས་སྣོན་པའི་མཛུབ་སྟོན་བསམ་བློ་དང་རྩ་དོན་བླང་བྱ། བྱ་བའི་ཁྱབ་ཁོངས་དང་གཏད་ཡུལ། ལས་འགན་གཙོ་བོ། ལས་ཁུངས་ཀྱི་འགན་འཁྲི། དཔུང་སྡེ་འཛུགས་སྐྲུན་སོགས་ངེས་གསལ་བྱེད་པ་དང་། མགོ་ཁྲིད་ཀྱི་སྒྲིག་སྲོལ་དང་བྱ་བའི་ནང་རྐྱེན་འཐུས་ཚང་དུ་བཏང་སྟེ། གྲོང་གསེབ་དར་སྤེལ་འཐབ་ཇུས་ཕན་ཡོད་སྒོས་ལག་ཏུ་བསྟར་བར་ཁག་ཐེག་བྱ་དགོས།

(གསུམ།)“ཞིང་གསུམ”བྱ་བའི་དཔུང་སྡེ་འཛུགས་སྐྲུན་ལ་ཤུགས་བསྣན་དགོས།

ཞིང་ལས་ཤེས་པ་དང་ཞིང་སྡེར་དགའ་བ། ཞིང་པར་དུང་བ་ཡོད་པ་བཅས་རྩ་བའི་བླང་བྱ་བྱས་ཏེ། “ཞིང་གསུམ”བྱ་བའི་ལས་བྱེད་པའི་དཔུང་སྡེ་སྐྱེད་སྲིང་དང་སྡེབ་སྒྲིག དོ་དམ། བཀོལ་སྤྱོད་བཅས་བྱ་བར་ཤུགས་བསྣན་དགོས། རིམ་པ་སོ་སོའི་ཏང་ཨུ་དང་སྲིད་གཞུང་གི་མགོ་ཁྲིད་ལས་བྱེད་པ་གཙོ་བོས“ཞིང་གསུམ”བྱ་བ་ཤེས་པ་དང“ཞིང་གསུམ”བྱ་བ་འཛིན་ཤེས་དགོས་ལ། ལས་བགོས་འགན་ཁུར་གྱི་མགོ་ཁྲིད་པ་ནི“ཞིང་གསུམ”བྱ་བའི་ཆེད་མཁས་པ་ངོ་མར་འགྱུར་དགོས། ཟབ་སྦྱོང་འཆར་གཞི་གཏན་འབེབས་བྱས་ཐོག་ལག་བསྟར་བྱས་ཏེ། “ཞིང་གསུམ”ལས་བྱེད་པའི་དཔུང་སྡེའི་ནུས་ཤུགས་དང་ཆུ་ཚད་ཁྱོན་ཡོངས་ནས་ཇེ་ཆེ་ཇེ་མཐོར་གཏོང་དགོས། རྫོང་རིམ་པའི“ཞིང་གསུམ”བྱ་བའི་སྡེ་ཁག་དང་ཞང་གྲོང་གི་ལས་བྱེད་པའི་ཡོང་ཁུངས་ཐབས་ལམ་གྱི་རྒྱ་བསྐྱེད་དགོས། ཞིང་སྡེའི་འཐབ་ཕྱོགས་དང་པོ་རུ་བྱ་བ་བསྒྲུབས་ནས་སྦྱོང་བརྡར་བྱེད་པ་དེ་ལས་བྱེད་པ་སྐྱེད་སྲིང་གི་ཐབས་ལམ་གལ་ཆེན་དུ་འཛིན་པ་དང་། གྲུབ་འབྲས་ཕུལ་དུ་བྱུང་བའི་ལས་བྱེད་པ་བསྐོ་འཐེན་བྱ་རྒྱུར་དོ་སྣང་བྱས་ནས། འཇོན་མི་ཞིང་སྡེ་དང་གཞི་རིམ་གྱི་འཐབ་ཕྱོགས་དང་པོའི་ཕྱོགས་སུ་སྐྱོད་པའི་མི་བཀོལ་ཁྲིད་ཕྱོགས་ཆགས་པར་བྱ་དགོས།

(བཞི།) གྲོང་གསེབ་དར་སྤེལ་འཆར་འགོད་ཀྱི་སྣེ་ཁྲིད་བྱེད་ཤུགས་ཇེ་དྲག་ཏུ་གཏོང་དགོས།

རྒྱལ་ཁབ་ཀྱི་གྲོང་གསེབ་དར་སྤེལ་འཐབ་ཇུས་འཆར་འགོད(2018ལོ་ནས2022ལོའི་བར)གཏན་འབེབས་བྱས་ཏེ། 2020ལོར་འབྱོར་འབྲིང་སྤྱི་ཚོགས་ཁྱོན་ཡོངས་ནས་བསྐྲུན་པ་དང2022ལོར་ཏང་གི་ཚོགས་ཆེན་ཐེངས་ཉི་ཤུ་པ་འཚོག་པའི་བར་གྱི་དམིགས་འབེན་ལས་འགན་ཐ་དད་དུ་ངེས་གསལ་བྱེད་པ་དང་། བྱ་བའི་གཙོ་གནད་དང་སྲིད་ཇུས་བྱེད་ཐབས་ཞིབ་ཚགས་ཅན་དང་དོན་དམ་ཅན་དུ་གཏོང་བ་དང་། བཟོ་འགོད་གལ་ཆེན་དང་འཆར་གཞི་གལ་ཆེན། འགུལ་སྐྱོད་གལ་ཆེན་འགའ་བཀོད་སྒྲིག་བྱ་དགོས། ས་ཁུལ་སོ་སོ་དང་སྡེ་ཁག་སོ་སོས་གྲོང་གསེབ་དར་སྤེལ་གྱི་ས་གནས་འཆར་འགོད་དང་ཆེད་དོན་གྱི་འཆར་འགོད་དང་ཇུས་གཞི་བཟོ་དགོས། འཆར་འགོད་རིགས་སོ་སོར་གཅིག་གྱུར་གྱིས་དོ་དམ་དང་མ་ལག་སྦྲེལ་མཐུད་ཐད་ཤུགས་བསྣན་ཏེ། གྲོང་ཁྱེར་དང་གྲོང་གསེབ་མཉམ་འདྲེས་དང་ས་ཁོངས་གཞི་གཅིག་ཅན། འཆར་མང་གཅིག་སྒྲིལ་གྱི་འཆར་འགོད་མ་ལག་ཆགས་པར་བྱ་དགོས། འཕེལ་རྒྱས་ཀྱི་ད་ལྟའི་གནས་ཚུལ་དང་དགོས་མཁོ་ལྟར་རིགས་བཀར་བ་ནས་གྲོང་གསེབ་དར་སྤེལ་ལ་གོ་རིམ་ལྡན་པའི་སྒོ་ནས་སྐུལ་འདེད་བྱ་དགོས་ཤིང་། ཆ་རྐྱེན་འཛོམས་པའི་སྡེ་བར་མཁར་གྲོང་གི་རྨང་གཞིའི་སྒྲིག་བཀོད་དང་སྤྱི་པའི་ཞབས་ཞུ་དེ་ཞིང་སྡེའི་ཕྱོགས་སུ་བསྲིང་བར་སྐུལ་འདེད་བྱེད་པ་དང་། རང་བྱུང་ལོ་རྒྱུས་རིག་གནས་ཀྱི་ཐོན་ཁུངས་ཕུན་སུམ་ཚོགས་པའི་སྡེ་བར་གཅིག་གྱུར་གྱིས་འཆར་འགོད་དང་ཕྱོགས་ཡོངས་ལ་ལྟ་རྟོག་སྒོས་སྲུང་སྐྱོབ་དང་གོང་སྤེལ་གཏོང་དགོས། འཚོ་གནས་ཆ་རྐྱེན་སྡུག་པོ་དང་སྐྱེ་ཁམས་ཁོར་ཡུག་ཉམས་ཞན་ཡིན་པའི་སྡེ་བར་སྐྱེ་ཁམས་ཡུལ་མི་གནས་སྤོ་བྱེད་ཤུགས་ཆེ་རུ་གཏོང་དགོས།

(ལྔ།)གྲོང་གསེབ་དར་སྤེལ་ལ་ཁྲིམས་སྐྱོང་གིས་འགན་སྲུང་བྱེད་ཤུགས་ཇེ་དྲག་ཏུ་གཏོང་དགོས།

གྲོང་གསེབ་དར་སྤེལ་བཅའ་ཁྲིམས་ཀྱི་འབྲེལ་ཡོད་བྱ་བ་དམ་འཛིན་གྱིས་ཞིབ་འཇུག་གཏན་འབེབས་བྱས་ཏེ། ལག་བསྟར་ཕན་ནུས་ལྡན་པའི་གྲོང་གསེབ་དར་སྤེལ་གྱི་སྲིད་ཇུས་ཁྲིམས་བཀོད་ཅན་དུ་བསྒྱུར་བ་དང་། གྲོང་གསེབ་དར་སྤེལ་ཁྲོད་དུ་ཁྲིམས་འཛུགས་ཀྱི་འགན་སྲུང་དང་སྐུལ་འདེད་ནུས་པ་འདོན་སྤེལ་གང་ལེགས་བྱ་དགོས། འོས་འཚམ་མིན་པའི་བཅའ་ཁྲིམས་དང་ཁྲིམས་སྲོལ་ལ་དུས་ཐོག་ཏུ་བཟོ་བཅོས་བྱེད་པའམ་མེད་པར་བཟོ་དགོས། འབྲུ་རིགས་ཉེན་མེད་བདེ་འཇགས་འགན་སྲུང་བཅའ་ཁྲིམས་འཛུགས་པར་སྐུལ་འདེད་གཏོང་དགོས། ས་གནས་སོ་སོས་རང་ས་གནས་ཀྱི་གྲོང་གསེབ་གོང་སྤེལ་གྱི་དགོས་མཁོ་དངོས་ལ་གཞིགས་ནས། གྲོང་གསེབ་དར་སྤེལ་ལ་སྐུལ་འདེད་གཏོང་བའི་ས་གནས་རང་བཞིན་གྱི་ཁྲིམས་སྲོལ་དང་ས་གནས་སྲིད་གཞུང་གི་སྒྲིག་སྲོལ་གཏན་འབེབས་བྱ་དགོས་པ་དང་། གྲོབ་གསེབ་ཀྱི་སྡོམ་རྩིས་བྱ་བ་དང་གཞི་གྲངས་གསར་སྤེལ་བཀོལ་སྤྱོད་བྱ་བར་ཤུགས་བསྣན་དགོས།

(དྲུག)གྲོང་གསེབ་དར་སྤེལ་གྱི་སྣང་ཚུལ་ལེགས་པོ་ཞིག་བསྐྲུན་དགོས།

ཏང་ཡོངས་དང་རྒྱལ་ཡོངས། སྤྱི་ཚོགས་ཡོངས་ཀྱིས་གྲོང་གསེབ་དར་སྤེལ་གཏོང་བའི་སྟོབས་ཤུགས་ཆེན་པོ་གཅིག་ཏུ་བསྒྲིལ་ཐོག ཏང་གི་གྲོང་གསེབ་དར་སྤེལ་གྱི་བྱེད་ཕྱོགས་སྲིད་ཇུས་དང་ས་གནས་སོ་སོའི་ལག་ལེན་ཕུན་སུམ་ཚོགས་པ་དྲིལ་སྒྲོག་བྱས་ཏེ། གཞི་རིམ་གྱི་ལས་བྱེད་པ་དང་མང་ཚོགས་ཀྱི་སྙིང་སྟོབས་བསྐྱེད་དགོས། གྲོང་གསེབ་དར་སྤེལ་གྱི་ཆེད་མཁས་པའི་ཇུས་ཆོད་འདྲི་རྟོག་ལམ་ལུགས་བཙུགས་ཏེ། རིག་མཛོད་རྩ་འཛུགས་བྱས་ཏེ་གཞུང་ལུགས་ཞིབ་འཇུག་ལ་ཤུགས་བསྣན་དགོས། གྲོང་གསེབ་དར་སྤེལ་ཐད་ནས་རྒྱལ་སྤྱིའི་བར་འབྲེལ་འདྲིས་དང་མཉམ་ལས་བྱ་བར་སྐུལ་འདེད་བྱས་ཏེ། གྲོང་གསེབ་དར་སྤེལ་གྱི་ཀྲུང་གོའི་གཏམ་རྒྱུད་ལེགས་པོར་འཆད་པ་དང་། འཛམ་གླིང་ལ་ཀྲུང་གོའི་བློ་གྲོས་དང་ཀྲུང་གོའི་ཇུས་འགོད་ཀྱི་བྱས་རྗེས་འཇོག་དགོས།

ང་ཚོས་བློ་མཐུན་ཞི་ཅིན་ཕེན་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་སྔར་ལས་མཐུན་སྒྲིལ་དམ་པོ་བྱས་ཏེ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་ཤིང་། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བྱས་ནས། དཀའ་ངལ་གདོང་གིས་བསུས་ཏེ་མདུན་དུ་སྐྱོད་པ་དང་སྙིང་རུས་ཆེར་བསྐྱེད་སྒོས་བྱ་བ་སྒྲུབ་པ། གསར་གཏོད་ཁྲོད་ཡར་རྒྱས་བརྩོན་ལེན་བྱས་ཏེ། འབྱོར་འབྲིང་སྤྱི་ཚོགས་ཁྱོན་ཡོངས་ནས་བསྐྲུན་པར་རྒྱལ་ཁ་ཕུ་ཐག་ཆོད་པ་ལེན་པ་དང་། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལ་རྒྱལ་ཁ་རླབས་པོ་ཆེ་ལེན་པར་བྱས་རྗེས་གསར་པ་འཇོག་དགོས། 

©༢༠༡༧ཀན་ལྷོའི་ཏང་གི་འཛུགས་སྐྲུན་དྲ་བ། ཀྲུང་གུང་ཀན་ལྷོ་ཁུལ་ཨུའི་རྩ་འཛུགས་པུའུ་ཡིས་གཙོ་སྒྲུབ་བྱས་པས་པར་དབང་འདི་གར་དབང་།

སྡོད་གནས། ཀན་ལྷོ་ཁུལ་ཨུའི་གཅིག་གྱུར་གཞུང་ལས་ཐོག་ཁང་གི་དྲུག་ཐོག ཁ་པར། ༠༩༤༡--༨༢༢༢༡༥༩ སྦྲག་ཨང་། ༧༤༧༠༠༠

དྲ་ངོས་རྡེབ་ཚད།མི་ཐེངས། དྲ་ངོས་སྒྲིག་བཟོ། ཧུང་ཏེན་དྲ་རྒྱ།

甘公网安备 62300102000044号